صور ..... وآراء >>> شاركنــــا

الحياة ايه غير شوية صور
صورة واحد بيبكي ، وصورة واحد بيفرح
صورة واحد بيبني وصورة واحد بيهدم
صورة واحد بيحب وواحد بيكره
هي دي الحياة شوية صور جنب بعض

انا جبتلكم مجموعة صور
ما تيجوا نتكلم عليها شوية
إيه رأيكوا
يلااااااااا

صور ..... وآراء >>> شاركنــــا 387301851

[size=16]الصورة دي وقفتني قدامها كتير
يا ترى العسكري الأمريكي ده بيعيط ليه وهو ماسك الطفل العراقي ده اللي مات في احدى الغارات الأمريكية ؟؟
يا ترى كان حاسس بأيه ساعتها ؟
يا ترى كان شعوره إيه وهو شايف إنه بين يوم وليلة تحول لقاتل
وسط جيش من القتلة بيخرب بلاد لا هي حاربتهم ولا وقفت قصادهم ؟

صعب اوي انك تفضل ماشي في طريق غير الطريق اللي كنت راسمه لنفسك
صعب اوي تعمل كل شيء انت كارهه
صعب اوي تقتل وانت بتحب الحياة
صعب اوي تكره وانت ما بتحبش غير كل الخير للناس
يا ترى كام إنسان في الدنيا دي صحى ولقى نفسه كده
بقى في يوم وليلة انكتب عليه يعيش حياته قاتل و سفاك دماء
رغم انه من جواه انسان طيب
صور ..... وآراء >>> شاركنــــا 495766594

صور ..... وآراء >>> شاركنــــا 495766594

الصورة دي عجبتني اوي كانت في محطة مصر بالأسكندرية
مش عارف ساعات تمشي في الشارع تقول الشعب ده خلاص فقد الدين
الشعب ده خلاص عليه العوض
الشعب ده عايز ضرب الجذمة واللي بيعمله مبارك والحزب الوطني فيه حلال عليه
ما يهمكش المناظر أحنا فقدنا الدين في معناه الحقيقي
كله بيجري على مصلحته ويضر الباقيين وكله مستعد يشفط دم كله
وناس بتاكل في بعضها وتكره وتحقد وتغل في نفسها على بقية الناس وكله عايش
ممكن ما يكونش بيعمل حرام
لكنه لو جتله فرصة حرام فهو بالتأكيد مش حيفوتها
لكن مرة واحدة وفي نص كل العتمة دي بتظهر صورة وتقول والله الناس برده لسه فيها خير
صور ..... وآراء >>> شاركنــــا 559941623

صور ..... وآراء >>> شاركنــــا 559941623

الصورة دي بقى لواحدة كانت بتبيع ذرة في الشارع
وبعدين عدوا من جنبها الناس بتوع كفاية في مظاهرة ليهم
لما عرفت انهم بيهتفوا ضد الرئيس فضلت تزرغد
وقاموا حطوا لها لا لمبارك على صدرها

لو كل الشعب زي الست دي
لو كلنا ما خفناش لو كلنا اتكلمنا كان اكيد وضعنا ممكن يكون حاجة تانية
اكيد الست دي كانت خايفة زينا كلنا في يوم من الأيام
اكيد كانت بتوصي عيالها يمشوا جنب الحيط وما يتكلموش في السياسة
لكنها مرة واحدة حست انها لازم ترفع عن نفسها الخوف
لازم تقول مرة واحدة في حياتها لأ ، لازم في لحظة تقول كفاية
لازم تقول كفاية لنفسها الأول قبل ما تقولها لمبارك
لازم تقول كفاية سلبية كفاية خوف كفاية نفاق بقى لو مرة واحدة فقنا في عمرنا
و مرة واحدة نفضنا سلبيتنا وخوفنا عننا " مرة واحدة بس " مرة واحدة يا عالم
اكيد كان وضعنا ساعتها حيتغير كتير .

فكرتني برده بمظاهرة كنا فيها في الجامعة وجت بعدها واحدة وفضلت برده تزغرد
وقالت لنا انتوا عاملين مظاهرات ليه قلنا لها علشان فلسطين
قالت طيب ما تتظاهروا علشان العيشة اللي بقت غالية
احنا ما بقناش عارفين نأكل عيالنا
صور ..... وآراء >>> شاركنــــا 437707970

صور ..... وآراء >>> شاركنــــا 437707970

هي دي الحرب ناس تكسب وناس تخسر
الصورة من المعارك الأخيرة في الصومال
اللي خسروا هربوا خارج البلاد على قوارب برعاية امريكية
واللي كسبوا خلاص مسكوا الحكم
لكن اللي مات مين يا ترى يفتكره مين يا ترى يمسح دموع الطفل ده
الطفل بيشد والدته ويصحيها وينادي عليها تصحى
اصحي يا امي انا جعان ..انا تعبان انا عايز مسحة الحنان
بكى علشان يضغط عليها نفسيا ً
علشان تقوم بقى من نومها
ماهو لازم كل يوم يضغط على اعصابها ويبكي علشان تصحى وتجري عليه
تشوفه عايز منها إيه
لكنه ما يعرفش انها خلاص دي النهاية
نهاية امه وإنه خلاص مهما بكى عمرها ما هتصحى
عمرها ما هتديله مسحة الحنان
وانه اتكتب عليه انه يتيتم علشان قضية ما يعرفهاش
و ناس ما يعرفهمش وهما برده مش عايزين يعرفوه

صور ..... وآراء >>> شاركنــــا 467366755

هي دي البلد
عشر عساكر على كل مواطن
هي دي البلد
انا مش عايز اتكلم على المواطن المقهور انا عايز اتكلم على العسكري
العسكري ده طالع عينه ، كرامته ملغية ، العيشة مرة عليه
ممكن يكون ابوه او اخوه مش لاقيين ياكلوا ، مش لاقيين بتعالجوا
ومع كده عنده اخلاص شديد في القمع
مين اللي لغى شخصية العساكر دي ومسح امخاخها
وخلاهم في يوم وليلة يبقوا اعداء لوطنهم ولأحلام وطنهم
مين ؟؟؟ مين ؟؟

مين نكس الفطرة ، مين ربى في الناس دي حب العدوان
مين ربى فيهم ان كلهم عايز يبقى مرضي عنه من الظابط فيقدم اكتر واكتر
ويضرب اكتر ويقتل اكتر ويشوه ويعور اكتر واكتر
مش العسكري بس اللي كده
لأ والطالب اللي بيمشي في الجامعة يدور على اسامي الطلبة الناشطين سياسيا علشان يبلغ عنهم
والبقال اللي تحت البيت اللي شغال مرشد مباحث امن الدولة
وصحابك اللي في الشغل اللي ما تقدرش تتكلم في السياسة قدامهم علشان ما يبلغوش عليك رئيسك
مين اللي غير في الناس

هو فيه حد لعب في الجينات المصرية ولا هي جيناتنا مضروبة من يومها

الموضوع للمناقشة وتبادل الاراء

صراحه موضوع جميل جدااااا
وفعلا دى صور ملموسه فى الحياه وبنشوفها كل يوم
وناس كتير عايشنها بالاصح مفروض عليهم انهم يعيشوها
بتجعلهم اشخاص تانيه حتى لو فطرتهم عكس كده
بس الواقع بيفرض عليهم انهم يبقو كده
لمصالح ممكن ميكونش ليهم فيها فائده بل بالعكس بتعود عليهم بالضرر

موضوع هائل
الصور كلها معبره عن المشاعر اللى فيها
أوقات الصوره بتكون افضل من اى كلام ممكن يتقال
صورة الجندى الامريكى فيها احساس بالذنب كبير
بس فى رائى فى السياسه الموضوع مسالة صعبة أوى انك تقول رائك وابسط دليل المواطن اللى فى الصوره
بس بجد الموضع جميل اوى

مشرفة تاريخ التسجيل : 24/02/2009 على باب الله

لا حول ولا قوة الا بالله

صور فعلا معبرة عن اللى جواها جزاك الله خيرا

حسبنا الله ونعم الوكيل