أحلام طالب الهندسه

السلام عليكم ورحمه الله

إذيكم يابشمهندسين عاملين إيه يارب تكون الأمتحانات شغاله تمام واللى محلش ذى حالاتى كده يشد بقى الترم التانى عشان نخلص من السنه دى .........المهم طبعا كلكم مخنوقين دلوقتى من الأمتحانات عشان كده أنا جايب لكم قصيده النهارده بتتكلم عن مأساه طالب هندسه كتبها طالب معايا فى الكليه بس رائعه هو دلوقتى فى مدنى بس بيحكى عن الحياه فى إعدادى وفى مدنى معلش هى فيها أسماء المواد بتاعه مدنى فركزوا وإنتو بتقرأوها..... نشوفها مع بعض .....

أحلام المهندس المدنى- أوهام

طول عمرى بيقولوا علية تلميذ ناجح تلميذ شاطر

وامّا دخلت على الثانوية كنت نهارى وليلى بذاكر

والمجموع كان بالتقريب بسم الله فوق التسعين

وعشان أخلص م التعذيب أدامى فى الجامعة سنين

قلت يا واد اُدخل واتوكّل واهى هندسة هية اللى توكّل

واهى كام سنة وتفوت طوّالى بس ياروحى ع اللى جرالى

لمّا دخلت يادوب إعدادى كنت حديد أصبحت زبادى

كان الخَط بيعمى عنية لمّا أبحلق فى الوصفية

كنت اتمنى لو ادفع الجزية بس أجيب مقبول فى الفيزيا

كنت عشان دالة أفاضلها لازم اروّق وابقى فاضلها

كنت أخلص رسم واروّح ألاقينى ماشى باطّوح

وامتحانات تنقط وبلاوى واكتب أى كلام بركاوى

قول ربك سهّل ونجحت وجريت على مدنى ودخلت

وصحيح مدنى أعز صديق لكن عيبه فيه خوازيق

تفضل تحرت فى الخرسانة تجنش سيخ وتربّط كانة

وتصمم كل القطاعات وحتملى الدفتر حسابات

وتشيكّات غلسة وكتير عندك بوند وعنك شير

وحتخرج م الفرحة تطير وحتضمن حتى التقدير

تلقى الدكتور بيخلّيك ويقول لك فيتال ميستيك

والاستيل تصحاله من بدرى تنقص فيه تو ماركس دغرى

تعصر مخّك م التفكير سِنجل وللا ده دبل شير

ودماغك على طول حتّربس وشيطانك على طول حيوسوس

تاكل فى ضوافرك وايديك وتلاغى زمايلك حواليك

وأخيرا ربك يفرجها وحتمسك قلمك وحتهدا

وتخلص والشغل كتير وتسمّر كل المسامير

والآخر تلقى التقدير ميجبش حق المسامير

أمّا الرَىْ حتغرق فيه على يخت الدكتور على بيه

حتراجع كل الأفكار فى القنطرة أو فى الهدّار

وحتبقى فى الكوبرى جعيص ولا حيهمّك أى هويس

وحتدخل وانت بتتفذلك والآخر حيجيب سيْنوبتيك

غير سِكة وسُويل ومساحة صحية وطرق بصراحة

أكتر من ده واستحملنا ونعدّ الأيام بالثانية

علشان ييجى اليوم وأملنا يتحقق ونشوف الدنيا

كنت بظُن لو ابقى مهندس ح اخلق لآمالى دنيتها

أتارينى بحلم وبهلوِس واتارينى جاى من خربتها

عشرين سنة بحفظ واتعلم واسهر واتعب وازهق واكتم

وانجح سنة ورا سنة بحرارة وافضل اغيّر ف النضارة

ولا قادر ألعب ولا اهرّج علشان ييجى اليوم واتخرّج

واترّيش واركب عربية وارحم بطنى من الطعمية

وابنى لى فيللا على النيل غير مكتب خرسانة واستيل

واتجوّز واقعد فى البيت وارتاح حَبة من التنطيط

وأخلّف حبة بهوات نازلين راكبين عربيات

بس دى كدبة وكدبناها على نفسينا وصدقناها

وان كنا فكّرنا شوية فى الكلية مادخلناها

م الأول كان لازم أعرف إنى راح اخرج زى موظف

وان سنين الشقا حيطيرو وانى كمان حبدأ م الزيرو

حتى لو انده يوم ع الحب اللى نسيته سنين فى الغُلب

ح اطلب من ابوها أتجوز وامّا حيعرف إنى مهندس

على طول الراجل يتبسّم ويقوللى أيوة إتكلم

وامّا حيسألنى عن دخلى على طول الراجل حيبلّم

وح اقول له أنا فى الصبحية فى الشركة وبجيب كام مِيه

بعد الضهر كمان فى المكتب وح ازوّدهم لك كام مية

ح يقول لى مش ناوى تسافر وح اقول له دول عايزين خبرة

حيقول لى طيّب لو تسمح روح للباب واقفله من بَرّة

وان ماكانتش البنت تصمّم وتقول له يابابا انا عايزاه

على طول الراجل ح يكتّم ع الموضوع ويقول لى انساه

وانا بصراحة لو فى مكانه لازم أتكلم بلسانه

مادّيش بنتى ف يوم لمفلّس لو حتى فى شهادته مهندس

يعنى صنايعى يفتح بيت أحسن م الشهرة وم الصيت

علشان كدة فيه سؤال بيزنّ على ودنى مش عارف اجاوبه

لمّا اتجوز وأجيب إبن أتمنى له إيه واحلم به

أحسن اشوفه خريج جامعة بس بيركب فى الحناطير

وللا أشوفه صاحب صنعة بس بيركب فى الخنازير

يبقى أكيد فيه حاجة غريبة وكمان تبقى ف حقنا عيبة

لو يوم راح اباشر نجار أو حداد واكشف أخطائهم

وانا لو اطبّق ليل ونهار عمرى ما حوْصل لمرتبهم

علشان كدة أنا دايما اقول لك يا بلدى رغم انّى بحبك

لكن لية رجاء فى الآخر زى ما بدّى لازم تدّى

علشان ماأسبكيش وأسافر ويقولو مبحبّش بلدى

وانا طول عمرى بعيِش من خيرك وماليش صدر حنيّن غيرك

وماليش أى كيان غير بيكى وماليش أى احباب غير فيكى

affraid

السلام عليكم
القصيده جميله جدا ودمها خفيف
جزاك الله كل خير
انا اختى فى مدنى وقراتها وعجبتها اوى
وعجبها اوى
التسلسل الجميل للمواد
فعلا بتجسد اللى بيحصل فى كليه الهندسه
ربنا يوفقكم ان شاء الله ويوفقنا احنا كمان

مشرفة تاريخ التسجيل : 24/02/2009 على باب الله

لا اله الا الله

هههههههههههههههههههه

الا الوصفيه دى

احنا مصورين المحاضرات فيديو .. وهنفهمها فى الاجازه بقى هههههههه

انا لقيت كتااب اسمه الالى البهيه فى الهندسه الوصفيه هههههه والله الكتاب غريب اوى موت علىنفسى من الضحك

تمااااااام يا ساامح

بس الحمد لله ماليش فى المدنى
لان المسطره هتبقى اطول منى وانا مش نااااقص ذل ياعم هههههههه

ان شاء الله اتصالات او كهرباء او حاسبات والاحتمال الكبير كيمياء(حاجه غريبه اوى والله ) بس يارب اعدى اعدادى على خير

يارب سترك ورضاااااااك

امتحنت امتحان تفاضل وتكامل ...لا تعليق

تمام ياسامح

وانا بكتب قصيده بردو دلوقتى فى المواد وفى الدكاتره وفى كل حاجه ههههه

الى الاماممممممممم

المحجبة كتب:: لا اله الا الله

سيدنا محمدا رسول الله