ودخلنا ع الصيف يا سيكو

ودخلنا ع الصيف يا سيكو

- يا سلام على ريحة اليود ومية المالح
- حاجة ترد الروح
- شوية هوا بالصلاة ع النبى

جاءت الكلمات بالترتيب على لسان صالح ومسعود وسيكو
وقبل غرس الشمسية فى الرملة مسعود لاحظ ان صالح عمال يبص يمين وشمال
كأن شئ تايه منه فسأله:
- مالك يا بو صلاح ؟
- عايزين ركن هادى .
- إزاى ؟
- من غير كدا ولا كده
- آه خالى من الكوليسترول...عندك حق
- إيه رآيك فى الحته اللى هناك دى

الحوار شغال بين صالح ومسعود ومش واخدين بالهم من سيكو اللى فتح الشنطة
وطلع منها حاجة زى ماسورة ميه بوصه ونص إتضح إنها منظار مكبر ونازل
دوران ع البلاج 360 درجة كأنه ماسك منظار غواصه بتبحث عن العدو .
- بتعمل إيه يا سيكو ؟
- حرام عليك كدا يا سيكو
- إنت معندكش خوات بنات

طبعا فهمو صاحبنا كان بيبص على إيه سيكو نزل المنظار.. حس بشئ من الحرج والحقيقة هو شقى وبتاع مقالب لكن عنده استعداد للرجوع
- إيه يا جماعه ببص ع المراكب البعيده
- المراكب اللى تحت الشماسى يا سيكو ؟
وطرقع سيكو بضحكة فيها كسوف وقال وهو بيهز رآسه :
- عدوها بقى.... عفا الله عما سلف .
وراح لافف المنظار بورق الجرايد وشايله فى الشنطة .
فى الركن البعيد الهادى القعده هايله والموج مش عالى... المفاجأة ان
بعد الخروج من غرفة الملابس اتضح ان سيكو لابس مايوه فخادى
- إيه ده يا ابنى ؟
- مش بحر ؟
- هو البحر أجازة من الاخلاق ؟
- طب أعمل إيه ؟
- البس فوقيه شورت هى كيميا ؟

وطلعنا من تانى مطب دخلنا ع التالت .
إيه اللى حصل ؟
الشلة سمعت صوت الاذان...صالح لاحظ ان عدد من الشبان بيتوضأ فى البحر فقال لصحابه :
- ما شاء الله انا شايف شباب كتير بيتوضأ .
استغرب سيكو وسأل باستنكار :
- إزاى يتوضوا من البحر ؟
- بتستغرب ليه؟
- ينفع؟
- " هو الطهور ماؤه... الحل ميتته " ...سيدك النبى قال كده
- وتفتكرهم بيتوضوا عشان يصلوا ؟
وسخسخ مسعود من كتر الضحك وفين وفين قال لسيكو :
- بالعقل كدا بيتوضوا ليه....عشان يستعدوا للغدا ؟
- قصدى يمكن يكون ده مش وضوء... مجرد تشطيف وخلاص وبعدين يصلو إزاى وهما لابسين مايوهات .

صالح قال :
- المصلية يا سيكو جنب غرفة الملابس..أكيد حيلبسوا حاجة فوق المايوهات
رد سيكو وقال :
- عندى فكره... إحتياطى انا ممكن اعمل اعلان جوه المصلية .
- إعلان ؟
- مش بتلاقى جوه الجامع صورة موبايل ومشطوب عليها بعلامة إكس
- آه.. عشان الناس تقفل الموبايل .
- إيه رآيكو أعلق جنب القبلة صورة كبيرة لشاب لابس مايوه فخادى وعليها علامة إكس.... ومكتوب تحتها متعملش زى سيكوووووووووووو

كبار الشخصيات تاريخ التسجيل : 30/07/2008

والله يا ميدو انت برنس ومش هقلك

مشكور والكلام ده , انت بجد دحكتني

جامد في وقت كنت متضايق اويي

بجد نفسي اشوف قصص من دي

تاني ربنا يخليك , ويا ريت يكون

للقصة تكملة عشان دي جمدة طحن

عضو VIP تاريخ التسجيل : 20/07/2008

هههههههههههههههههههههههههههههههههههه

تحفة بجد

جزاك الله كل خير